ਗੱਲਾਂ ਗੀਤਾਂ ਗ਼ਜ਼ਲਾਂ ਨਜ਼ਮਾਂ ਵਿੱਚ ਕਹਾਣੀ ਤੇਰੀ ਏ l
ਸੋਝ ਸਿਆਣਪ ਇੱਕ ਪਾਸੇ ਇਹ ਜਿੰਦ ਦੀਵਾਨੀ ਤੇਰੀ ਏ l
ਕੋਝੀ ਕਮਲੀ ਰਮਲੀ ਕਹਿੰਦੇ ਫ਼ਿਰਦੇ ਲੋਕ ਬਥੇਰੇ ਹੁਣ,
ਨਾਵਾਂ ਦਾ ਜੋ ਹੜ ਆਇਆ ਏ ਮਿਹਰਬਾਨੀ ਤੇਰੀ ਏ l
ਹੋ ਜਾਂਦਾ ਮਹਿਸੂਸ ਤੂੰ ਜੱਦ ਵੀ ਅੱਖਾਂ ਬੰਦ ਕਰ ਲੈਂਦੀ ਹਾਂ,
ਮੇਰੇ ਚੱਲਦਿਆਂ ਸਾਵ੍ਹਾਂ ਦੇ ਵਿੱਚ ਮਹਿਕ ਸੁਹਾਨੀ ਤੇਰੀ ਏ l
ਕਹਿਣ ਨੂੰ ਭਾਵੇਂ ਦੂਰ ਸਹੀ ਨਾ ਰਾਹਾਂ ਦੀ ਕੋਈ ਸਾਂਝ ਰਹੀ,
ਛੱਲਾ ਉਂਗਲ ਮੱਲੀ ਬੈਠਾ ਪਿਆਰ ਨਿਸ਼ਾਨੀ ਤੇਰੀ ਏ ।
ਚਾਹ ਕੇ ਵੀ ਨਾ ਕੱਢ ਪਾਉਂਦੀ ਹਾਂ ਤੈਨੂੰ ਯਾਦ ਦੇ ਘੇਰੇ ਚੋਂ,
ਮੇਰੀਆਂ ਸਾਰੀਆਂ ਸੋਚਾਂ ਅੰਦਰ ਖਿਆਲ ਰਵਾਨੀ ਤੇਰੀ ਏ।
@ਪਰਜਿੰਦਰ ਕਲੇਰ
Post a Comment